Ақмола облысында эпидемиологиялық жағдай мәселелері бойынша кеңес өтті. Талқылау облыс әкімінің орынбасары Алтынай Әмренованың төрағалығымен өткен вакцинация штабының отырысы аясында жүргізілді.
Штаб жұмысына аумақтық мемлекеттік органдардың, облыстық медициналық ұйымдардың және бейінді қызметтердің басшылары қатысты. Өңірдегі қазіргі эпидемиологиялық ахуал және қабылданып жатқан шаралар туралы Ақмола облысының санитариялық-эпидемиологиялық бақылау департаментінің басшысы Серік Омарханов пен облыстық денсаулық сақтау басқармасының басшысы Нариман Ермек баяндама жасады.
Олардың мәліметінше, 2025 жылдың 12 айының қорытындысы бойынша өңірде инфекциялық аурушаңдық жалпы алғанда тұрақты деңгейде сақталып отыр, алайда қызылша мен көкжөтел жағдайлары ерекшелік ретінде атап өтілді. Атап айтқанда, 2025 жылы облыста қызылшаның 226 расталған жағдайы тіркелсе, 2024 жылдың сәйкес кезеңінде бұл көрсеткіш 877 жағдайды құраған. Бұл аурушаңдықтың 3,8 есеге төмендегенін көрсетеді. Ауруға шалдыққандардың 76,9 пайызы – 14 жасқа дейінгі балалар.
Аурушаңдық деңгейінің төмендеуі 2023 жылғы қарашадан 2025 жылғы қаңтарға дейін жүргізілген қосымша жаппай иммундау шараларының нәтижесі болып отыр. Қосымша жаппай иммундау аясында 42 мыңнан астам адам егілді, оның ішінде шамамен 39,8 мың бала және 2 370 медицина қызметкері бар. Тағы да қосымша иммундауымен шамамен 7 мың бала қамтылды.
Қазақстан Республикасының Ұлттық егу күнтізбесі шеңберінде профилактикалық егулермен қамту 2025 жылдың 12 айында 97,3 пайызды құрады, бұл белгіленген норматив – кемінде 95,5 пайыз деңгейінен жоғары. Қызылшаға, қызамыққа және эпидемиялық паротитке қарсы вакцинация 2 жасқа дейінгі 9 130 балаға жүргізілсе, 6 жастағы 11 240 бала ревакцинациядан өтті.
Сондай-ақ білім беру, спорт және әлеуметтік қорғау басқармалары басшыларының атқарылған жұмыстар туралы есептері тыңдалды. Олардың баяндамаларында жаппай іс-шараларды ұйымдастыру және өткізу мәселелеріне ерекше назар аударылды.
Штаб отырысының қорытындысы бойынша эпидемиологиялық жағдайға күшейтілген мониторинг жүргізу, профилактикалық және індетке қарсы іс-шараларды уақтылы жүзеге асыру, сондай-ақ халық арасында вакцинация мәселелері бойынша ақпараттық-түсіндіру жұмыстарын жандандыру тапсырылды.
