Көкшетау қаласында ұйымдасқан қылмысқа қарсы күрес басқармасының қызметкерлері әлеуметтік желілер арқылы жасалған бірқатар бопсалау деректерінің жолын кесті. Құқық қорғау органдарының мәліметінше, екі жергілікті тұрғын кемінде үш эпизод бойынша қылмыс жасады деген күдікке ілінді.
Тергеу барысында күдіктілердің алдын ала ойластырылған схема бойынша әрекет еткені анықталды. Олар әлеуметтік желілерде жалған аккаунттар ашып, қыздардың фотосуреттері мен жеке мәліметтерін пайдаланған. Осы аккаунттар арқылы жас жігіттермен танысып, кейін жеке кездесуге шақырған.
Алайда белгіленген кездесулерде жәбірленушілерді «кездесу» емес, бопсалаушылар күтіп отырған. Күдіктілер өздерін бұрынғы құқық қорғау органдарының қызметкерлері ретінде таныстырып, қылмыстық жауапкершілікке тартамыз немесе күш қолданамыз деп қорқыту арқылы ақша талап еткен.
Заңсыз әрекеттердің нәтижесінде үш жәбірленушіден жалпы сомасы бір миллион теңгеден астам қаражат алынғаны белгілі болды.
Жедел ақпараттың түсуіне байланысты ҰҚҚБ қызметкерлері жедел-іздестіру іс-шараларын жүргізіп, күдіктілердің қылмыстық әрекеттерін толық құжаттады. Екі адам да жәбірленушілердің бірінен кезекті ақша алу сәтінде қолға түсті.
Қазіргі таңда аталған фактілер бойынша қылмыстық істер қозғалып, тергеу амалдары жалғасуда.
Полиция азаматтарды қырағылық танытуға, әлеуметтік желілердегі күмәнді таныстықтарға сақтықпен қарауға және бопсалау мен қорқыту деректері орын алған жағдайда құқық қорғау органдарына дереу хабарлауға шақырады.
