Астана қаласында 19–20 қараша күндері өткен «Шабыт» XXVIII Халықаралық шығармашыл жастар фестивалі биыл да жас дарындардың бақ сынасқан айшықты алаңына айналды. Әр өңірден жиналған өнерлі жастардың ішінде Қосшы қаласы Мәдениет үйінің «Tartu» фольклорлық ансамблі де өз өнерін ортаға салды.
Ұлттық музыка өнерінің бояуын қанық жеткізуді мақсат тұтқан ұжым «фольклорлық ұжым» номинациясы бойынша үшінші орын иеленіп, фестиваль жүлдегерлері қатарынан табылды. Бұл — ансамбльдің кәсіби ізденісі мен тыңғылықты еңбегінің жемісі.
Ансамбльге жетекшілік ететін күйші Мейрам Айтмағанбетовтің еңбегі айрықша. Өнерге адалдығы мен орындаушылық шеберлігі арқылы ол жас музыканттарды ұлттық бағытта тәрбиелеп, қазақтың дәстүрлі әуенін жаңаша нақышпен жеткізуге жол ашып келеді.
«Tartu» құрамындағы жас өнерпаздар домбыра, жетіген, қылқобыз, сазсырнай, прима қобыз, дауылпаз, шаңқобыз секілді көне аспаптардың үнімен көрерменді тәнті етті. Әрбір нөмір ұжымдық үйлесімге, ұлттық нақышқа, нәзік әуезге құрылғаны байқалды.
Құрылғанына көп уақыт болмаса да, ансамбль бірталай бәйгелерде топ жарып, халықтың ыстық ықыласына бөленіп үлгерді. Бұл — бүгінгі жас буынның ұлттық өнерге деген қызығушылығының жоғары екенін көрсететін қуанышты жайт.
Өнер жолында ізденіп, ел мерейін өсіріп жүрген «Tartu» фольклорлық ансамблін жеңісімен шын жүректен құттықтаймыз. Жас таланттардың алдағы уақытта да биік белестерді бағындырып, қазақтың дәстүрлі музыкасын жаңа тыңдарманға кеңінен таныта беруіне тілектеспіз.
