Қосшы қаласында жастар мен полиция өкілдері қоғамдағы құқықтық мәдениетті арттыруға бағытталған бірлескен шара өткізді.
Қосшы қаласының Жастар ресурстық орталығы мен Қосшы қаласы Полиция бөлімінің қызметкерлері бірлесіп, учаскелік жедел профилактикалық іс-шарасы аясында «Халық патрулі» акциясын ұйымдастырды.
Іс-шара барысында тұрғындар арасында құқық бұзушылықтың алдын алу, интернет алаяқтықтың түрлері мен одан қорғану жолдары туралы кеңінен түсіндіру жұмыстары жүргізілді. Сонымен қатар, азаматтарға өз қауіпсіздігін қамтамасыз ету және күдікті жағдайлар кезінде полицияға жедел хабар беру тетіктері түсіндірілді.
Мамандардың айтуынша, акцияның басты мақсаты – қоғамдағы құқықтық мәдениетті арттыру, тұрғындардың қауіпсіздігін қамтамасыз ету, сондай-ақ азаматтардың құқықтық сауаттылығын дамыту.
Осындай шаралар халық пен құқық қорғау органдары арасындағы өзара сенімді нығайтып, қоғамдық тәртіпті сақтауға бағытталған ортақ жауапкершілікті арттыра түседі.
