Қосшы қаласында орналасқан Қоғамдық мәдени-спорт кешені бүгінде қала тұрғындарының рухани және мәдени өмірінің маңызды орталығына айналды. Мұнда өнер мен спортты ұштастыра отырып, жас ұрпақтың шығармашылық қабілетін дамытып, салауатты өмір салтын қалыптастыруға басымдық берілген.
Қазіргі таңда мәдени-шығармашылық бағыттағы 12 үйірмеде екі жүзге жуық жеткіншек білім алуда. Олардың арасында «Шертер» және «Алтын перне» домбыра, «Қобыз үні» қобыз, «Тылсым әуен» жетіген, «Саз сыры» сазсырнай, «Voice» және «Жұлдызды дауысы» вокал, «Кәусар» және «Ай-Қаракөз» ұлттық би, «Дежавью» актерлік шеберлік, «Аккорд әлемі» гитара және «Starline» заманауи би үйірмелері бар.
Бұл үйірмелер жас дарындардың сахна мәдениетін қалыптастырып, ұлттық өнерге деген қызығушылығын арттыруға бағытталған.
Спорт саласында да ауқымды жұмыстар жүзеге асуда. Қазіргі уақытта баскетбол, волейбол, футбол, үстел теннисі, көркем гимнастика, қазақша күрес, шахмат, джиу-джитсу және дзюдо секцияларында үш жүзден астам бала тұрақты түрде жаттығады.
Қосымша білім беру бағытында да заманауи үйірмелерге сұраныс жоғары. Робототехника үйірмесіне екі жүзге жуық бала қатысып жүр. Сонымен қатар компьютерлік графика, мобилография, қыш құмыра жасау, бейнелеу өнері және тігін ісі бойынша жүз елуге жуық бала өз қабілетін жетілдіруде.
Биылғы жылдың он айында мәдени-спорт кешенінде екі жүз елуге жуық іс-шара ұйымдастырылып, оған қырық мыңнан астам көрермен қатысқан. Бұл – қаланың мәдени өміріндегі серпінді өзгерістердің айғағы.
Қосшы өнерпаздары халықаралық, республикалық, облыстық және аймақтық деңгейдегі байқауларда жоғары нәтижелерге қол жеткізді. Жыл басынан бері олар бірнеше халықаралық және республикалық, сондай-ақ 11 облыстық және 3 аймақтық байқаудың Бас жүлдесін жеңіп алған.
Қосшы қаласындағы Қоғамдық мәдени-спорт кешенінің жұмысы – жастардың бос уақытын тиімді өткізуіне, шығармашылық пен спортқа бейімделуіне, ел руханиятына өз үлесін қосуына бағытталған игі бастама болып отыр.
