Республика күні қарсаңында Қосшы қаласында ел еңбегін дәріптеп, ұлттық өнерді ұлықтауға арналған аймақтық жас ақындар айтысы өтті. «Еңбегім саған, елім» деген атаумен ұйымдастырылған бұл рухани кеш көрермен көңілінен шығып, ел мен еңбектің егіз ұғым екенін тағы бір мәрте еске салды.
Шараға қала әкімі Азамат Қапышев арнайы қатысып, жас айтыскерлерге ізгі тілегін арнады. Ол өз сөзінде Республика күнінің мәні – ең алдымен елінің іргесін еңбегімен бекіткен қарапайым халықтың мерейін өсіру екенін атап өтіп, айтыс өнерінің жастарға рух пен жауапкершілік сыйлайтынын айтты.
Қосшы қала мәртебесін алғаннан бері жыл сайын дәстүрге айналған бұл айтыс бүгінде өңірдің мәдени тынысын айқындайтын айтулы оқиғаға айналып үлгерді. Сахна төріне шыққан он екі жас айтыскер өз өнері арқылы халыққа рух сыйлап, елдік пен ерлік, адал еңбек пен отансүйгіштік туралы жүрекжарды жырларын арнады.
Айтыстың тізгінін ұлт мақтанышы, «Алтын домбыра» иегері Еркебұлан Қайназар ұстады. Қазылар алқасы құрамында ҚР еңбек сіңірген қайраткері Ерболат Шалдыбеков, ақын, ғалым Әсем Ережеқызы және белгілі ақын Бауыржан Қарағызұлы болды.
Жас толқынның сөз сайысы қызыққа толы өтті. Көрермен көзайымына айналған өткір ойлы ақындардың арасынан бас жүлдені Сырым Нығызбаев иеленсе, бірінші орын Мұхтар Қонарбаевқа бұйырды. Нартай Тілеуқұл мен Нәрия Ақбабақызы екінші орыннан көрінді, ал Берденбек Мырзат, Нұрмахан Жақыпбек және Таңжарық Ержан үшінші орынды бөлісті. Қалған жас ақындар да өз өнерлерімен көрермен ықыласына бөленіп, ынталандыру сыйлығымен марапатталды.
Қосшы төрінде өткен бұл айтыс тыңдарманға рухани серпіліс сыйлап қана қоймай, еңбектің қадірін, сөздің қасиетін, елдік сана мен азаматтық рухтың биіктігін тағы бір мәрте айғақтап берді.
