Бүгін Ақмола облысының Аршалы кентінде 47 отбасы көптен күткен баспанасының кілтін алды. Бұл қуанышты сәт жылдар бойы кезегін күткен тұрғындарды бір арнаға тоғыстырды, деп хабарлайды Өңірлік коммуникациялар қызметі.
Жаңа 100 пәтерлі тұрғын үй өткен жылы реновация бағдарламасы аясында салынған. Алғашқы қоныстанушыларға пәтер кілттері биыл наурыз айында табысталған болатын. Ол кезде 34 отбасы баспаналы болды.
Арада бірнеше ай өткен соң тағы 47 отбасы жаңа үйге қоныстану мүмкіндігіне ие болды. Олардың қатарында «Алтын алқа» және «Күміс алқа» төсбелгілерімен марапатталған екі көпбалалы ана, 11 көпбалалы отбасы, I және II топтағы мүгедектігі бар үш азамат, жеті жетім бала және ата-анасының қамқорлығынсыз қалған бала бар.
Сонымен қатар жаңа пәтерлер мүгедектігі бар балаларды тәрбиелеп отырған сегіз отбасыға және 16 толық емес отбасына берілді.
Қоныс той иелерін құттықтаған Аршалы ауданының әкімі Достанбек Есжанов жаңа баспананың әр отбасы үшін маңызы зор екенін атап өтті.
«Бұл кішкентай ғана кілттің артында әр отбасының өміріндегі үлкен оқиға тұр. Бұл – жаңа үйдің есігін ашып, өмірдің жаңа парағын бастап, жайлы әрі қолайлы жерде болашақ құруға мүмкіндік. Жаңа үйлеріңіз әрдайым жылы әрі жайлы болсын. Бұл шаңырақтарда баланың күлкісі сыңғырлап, туған-туыс пен достар бас қосып жүрсін. Барша қоныс иелеріне отбасылық амандық, бейбітшілік және ертеңгі күнге деген сенім тілеймін», – деді Достанбек Есжанов.
Жаңа пәтерлердің кілтін алу – баспанасын жылдар бойы күткен ондаған отбасы үшін көптен күткен қуанышты оқиға болды. Осылайша олар баспана кезегіндегі ұзақ күту кезеңін артқа тастап, жаңа өмірге қадам басты.
«Пәтерімізді өте ұзақ күттік. Арендалық тұрғын үй кезегінде 8 жыл тұрдық. Міне, бүгін көптен күткен күнге жетіп, өз пәтерімізге қол жеткіздік. Бүкіл отбасымызбен өте қуаныштымыз!» – деді қуанышын бөліскен Юлия Макухина.
