Көкшетауда «Қоғамдық келісім» КММ-де «Халық мұрасы» домбыра үйірмесінің есептік концерті өтті. Іс-шара Қазақстан Республикасы Конституциясының күшіне енген күніне орай ұйымдастырылды.
Концерт барысында мекеме басшысы Қуаныш Шақшақов сөз сөйлеп, жас өнерпаздарға сәттілік тіледі. Оның айтуынша, ұлттық өнерді дәріптеу – ұрпақ тәрбиесінің маңызды бөлігі.
Сондай-ақ үйірме жетекшісі Сәрсенбай Хасенов қатысушылардың жетістіктерін атап өтіп, атқарылған жұмыстарды қорытындылады.
Сахнада халық және авторлық ән-күйлер орындалды. Атап айтқанда, Сәкен Сейфуллиннің «Тау ішінде» әні, «Гүлдерай» халық әні, Біржан салдың шығармалары, сондай-ақ «Жезкиік», «Секіртпе», «Ата толғауы», «Әке толғауы» күйлері көрерменге ұсынылды.
Кеш аясында Конституция мен ұлттық құндылықтар тақырыбында викторина ұйымдастырылып, көрермендер белсенді қатысты.
Іс-шара соңында қатысушылар алғыс хаттармен марапатталды.
