Ақмола облысында жаңғырту жұмыстары аяқталғаннан кейін Курорт-Бурабай теміржол вокзалы пайдалануға берілді. Салтанатты іс-шараға Ақмола облысы әкімінің бірінші орынбасары Елдос Рамазанов, Қазақстан Республикасы Көлік министрлігі Теміржол және су көлігі комитеті төрағасының орынбасары Елдос Нестай және «ҚТЖ» ҰК» АҚ басқарма төрағасының орынбасары Мұрат Төрегелдин қатысты.
Бурабай – Қазақстандағы ең танымал туристік бағыттардың бірі, ал Курорт-Бурабай вокзалы курорттық аймақтың көлік қолжетімділігін қамтамасыз етуде маңызды рөл атқарады. Осыған байланысты нысан елдегі туристік бағыттарда орналасқан және жаңғырту бағдарламасы аясында ерекше назар аударылған 20 теміржол вокзалының қатарына енді.
«Щучинск қаласындағы вокзалдың реконструкциясы Мемлекет басшысының тапсырмасымен жүзеге асырылып жатқан еліміз бойынша 124 теміржол вокзалын жаңғырту жөніндегі ауқымды бағдарламаның бір бөлігі болып табылады. Өңірде көлік жүйесі кезең-кезеңімен дамып келеді. Жаңа тыныс алатын 16 вокзал бар, бұл – республикадағы ең жоғары көрсеткіш. Қолайлы жағдайлар өңірдің қала және ауыл тұрғындары үшін бұрынғыдан да қолжетімді бола түседі», – деп атап өтті Елдос Рамазанов.
Жаңғырту барысында ғимараттың қасбеті мен ішкі бөлмелері, инженерлік желілер жаңартылды, жайлы күту аймақтары жасалды, сондай-ақ мүмкіндігі шектеулі азаматтар үшін жағдайлар жақсартылды. Жүзеге асырылған шешімдер жолаушыларға көрсетілетін қызмет сапасын, қауіпсіздік пен жайлылық деңгейін арттыруға мүмкіндік берді.
Айта кетейік, Ақмола облысында маусым айының соңына дейін Макинск және Шортанды вокзалдары да ашылады.
