«Көкшетау» мәдениет сарайында Мәдениет және өнер қызметкерлері күніне арналған марапаттау рәсімі өтті. Мерекемен облыстың барлық аудандарынан келген мәдениет қайраткерлерін, шығармашылық ұжымдарды және өнер шеберлерін өңір басшысы Марат Ахметжанов құттықтады.
«Мәдениет – ұлттың жаны, ал өнер – өткен мен болашақты жалғайтын тірі көпір. Сіздердің арқаларыңызда дала данышпандарының ұлы мұрасы жалғасып келеді, ал біздің өңір елімізде ғана емес, халықаралық деңгейде де өзін сенімді танытып отыр. Баршаңызға ісіңізге адалдық пен қосқан үлестеріңіз үшін алғыс айтамын. Денсаулық, шабыт, береке және ұлттық мәдениет пен өнердің одан әрі өркендеуін тілеймін», – деді облыс әкімі.
Іс-шара аясында өңірдің рухани мұрасын дамытуға қосқан елеулі үлесі үшін сала үздіктері мемлекеттік наградалармен, медальдармен, құрмет грамоталарымен және алғыс хаттармен марапатталды.
Сондай-ақ осы күні «Өнер – халық қазынасы» байқауының қорытындысы шығарылды. Жеңімпаздар мен жүлдегерлерге ақшалай сертификаттар табысталды, ал Гран-при иегерлері басты сыйлықтарға – Chevrolet Cobalt автокөліктерін сатып алуға сертификаттарға ие болды. Оларды Целиноград және Бурабай аудандары, сондай-ақ Степногорск пен Қосшы қалалары алды.
Іс-шара мерекелік гала-концертпен аяқталды.
