Соңғы аптада Ақмола облысында екі адам түлкі тісінен зардап шекті. Бірінші оқиға Есіл ауданы Калачи ауылында тіркелді. Әйелді түлкі аяқтан тістеп, ол жабайы аңды шанышқымен өлтірген. Ерейментау ауданында осындай жағдай болды. Бұл жолы ер адам зардап шекті.
Ветеринарлық қызметтің мәліметіне сәйкес, кейбір аудандарда түлкілерге байланысты шектеу шаралары енгізілген. Алайда барлық аймақтарда бұл шаралар жүзеге асырылған жоқ. Ветеринарлық ведомство өкілдері әлі ресми түсініктеме бермей отыр.
Айта кетсек, бұған дейін де Бұланды ауданында және Көкшетау қаласында да түлкілер бой көрсеткен болатын. Әсіресе, облыс орталығындағы «Аяла» балабақшасының аумағында бірнеше күннен бері емін-еркін жүрген түлкі ата-аналарды алаңдатып отыр.
Осы ретте, мамандар тұрғындардан жануарларға жақындамауды, балалар мен үй жануарларын бақылауда ұстауды сұрайды. Егер тістеп алса, дереу ауруханаға және ветеринарлық қызметке хабарласу қажеттігін еске салады.
Сақ болыңыздар, қауіпті жағдайларды елемеңіздер.
