Қосшы қаласында қазан айы бойы – 1-інен 31-іне дейін – Қарттар күніне арналған «Қамқорлық айлығы» өтті. Бұл іс-шара республикалық жоспар аясында жүзеге асып, қарттар мен мүгедектігі бар азаматтарға әлеуметтік қолдау көрсетуге бағытталды.
Айлықтың басты мақсаты – аға буын өкілдерінің өмір сапасын арттыру, олардың қоғамдағы белсенділігін қолдап, құрмет пен қамқорлық көрсету болды.
Қосшы қаласында қазіргі таңда 424 мүгедектігі бар тұлға тіркелген. Оның ішінде:
I топтағы мүгедектігі барлар – 78 адам,
II топ – 152 адам,
III топ – 95 адам,
мүгедектігі бар балалар – 99.
- Айлық аясында әлеуметтік бағыттағы нақты істер жүзеге асырылды.
299 қарт азаматқа материалдық көмек көрсетілді; - Зейнет жасына жеткен 57 адамға шипажай-курорттық емделуге қаржылай қолдау берілді;
- Жұмыспен қамту мәселесіне де ерекше назар аударылды.
«Күміс жас» жобасы аясында 15 адам тұрақты жұмыспен қамтылды. Бұл жоспардың 115,4 пайызға орындалғанын көрсетеді. Сонымен қатар, мүгедектігі бар азаматтарға арналған бір әлеуметтік жұмыс орны ашылды.
Қалалық жұмыспен қамту орталығы 9 бос жұмыс орындары жәрмеңкесін ұйымдастырып, оған 260-тан астам тұрғын қатысты. Олардың арасында зейнеткерлер мен мүмкіндігі шектеулі азаматтар да бар.
«Біздің мақсат – бір реттік көмекпен шектелмеу. Ең бастысы – адамдардың қоғам өміріне белсенді араласуына мүмкіндік жасау. Қосшыда бұл бағытта жүйелі жұмыс жолға қойылған», – дейді Қосшы қаласы әкімдігінің әлеуметтік бөлімінің өкілдері.
Айлық аясында ұйымдастырылған іс-шаралар қаланың әр аумағын қамтып, әлеуметтік серіктестік пен азаматтық белсенділіктің жақсы үлгісін көрсетті.
Мұндай игі істер қоғамдағы мейірім мен өзара сыйластықтың арта түсуіне, сондай-ақ әр буынның арасындағы байланыс нығаюына сеп болады.
«Қарттар мен мүгедектігі бар азаматтарға қамқорлық – қоғамның рухани деңгейін көрсететін өлшем», – дейді ұйымдастырушылар.
