«Байтақ» партиясының төрағасы Азаматхан Әміртаев Құрылтай сайлауының қорытындыларына қатысты пікір білдіріп, партияның сайлау нәтижелеріне күмән келтіруге негіз жоқ екенін айтты. Оның сөзінше, қазіргі таңда азаматтардың ерік білдіруіне күмән келтіретін расталған деректер жоқ.
Азаматхан Әміртаев «Байтақ» партиясының Қазақстан халқының таңдауына құрметпен қарайтынын атап өтті. Партия сайлаудың заңда белгіленген тәртіппен анықталған ресми қорытындыларына сүйенетін болады.
Сонымен қатар партия төрағасы сайлау учаскелеріне келіп, өз азаматтық таңдауын жасаған барлық қазақстандықтарға алғысын білдірді. Ол бұл туралы әлеуметтік желідегі парақшасында жазды.
Қазақстанда кеше ел тарихындағы алғашқы Құрылтай сайлауы өтті. Орталық сайлау комиссиясының алдын ала мәліметінше, дауыс беруге 9 351 539 азамат қатысып, сайлаушылардың жалпы белсенділігі 74,08 пайызды құрады. Сайлау қорытындысы бойынша 7 партияның 5-еуі 5 пайыздық межеден өтті. «Байтақ» партиясы 1,07 пайыз дауыс жинады.
