Ақмола облысы құс еті мен жұмыртқа өндіруден ел бойынша көшбасшылық орнын сақтап келеді. Енді өңір өндіріс қарқынын үдетіп, жылдық жұмыртқа өндірісін 1 миллиард данаға дейін жеткізуді жоспарлап отыр. Облыстағы түйінді кәсіпорындардың бірі – Біржан сал ауданындағы «Қазгер-Құс» ЖШС құс фабрикасы. Жұмыс сапары аясында Ақмола облысының әкімі Марат Ахметжанов фабриканың үшінші кезеңінің құрылысымен жеке танысты.
Қазіргі таңда өңір Қазақстанда өндірілетін барлық құс етінің 30%-ын қамтамасыз етеді – бұл жылына 137 мың тонна өнім. Сондай-ақ республика бойынша өндірілетін жұмыртқаның 15%-ы (жобамен 700 миллион дана) осы облыстың үлесіне тиесілі. Бірақ Ақмола облысы бұл межемен шектелмек емес.
Үлгі ауылдық округінде «Қазгер-Құс» базасында 6 заманауи құс қораның құрылысы жүріп жатыр. Жылына 90 миллион дана жұмыртқа өндіретін жаңа қуаттылықты іске қосу кәсіпорынның жалпы өндіріс көлемін 340–350 миллион данаға дейін арттыруға мүмкіндік береді. Бұл фабриканы Қазақстандағы абсолютті көшбасшылық орынға шығарады. Жоба ауыл тұрғындарына 100-ден астам жаңа жұмыс орнын береді, ал органикалық тыңайтқыштарды қайта өңдеу желісінің іске қосылуы бұл алып өндірісті толығымен қалдықсыз етеді.
Нысанды аралау барысында Марат Ахметжанов ірі бизнестің дамуы мен аудан тұрғындарының әлеуметтік әл-ауқаты арасындағы тікелей байланысқа баса назар аударды.
«Мемлекет басшысы атап өткендей, жаңа экономикалық саясат –бұл бизнеспен серіктестік орнату. Инвесторлармен белсенді жұмыс істеп, кәсіпорындарды дамыту қажет, өйткені бұл – аудан бюджетіне түсетін салықтар, лайықты жалақы және жаңа жұмыс орындары. Еңбек өнімділігі неғұрлым жоғары болса, ауданның кірісі де соғұрлым артады, бұл инфрақұрылымның жақсаруына және халықтың өмір сүру сапасының артуына әкеледі. Дегенмен, мұндай ірі нысандарды салу кезінде барлық аспектілерде, соның ішінде экологиялық талаптарды орындауда заңдылықты қатаң сақтау қажет», – деп атап өтті облыс әкімі.
Сапардың маңызды аспектілерінің бірі – меншікті репродуктор жобасын талқылау болды. Бұл Ақмола облысына асыл тұқымды құс өсіруден бастап соңғы қайта өңдеуге дейінгі толық жабық циклге өтуге мүмкіндік береді. Өңір импортқа тәуелділіктен арылып, инкубациялық жұмыртқа сатып алудағы өз қажеттілігін толықтай өзі қамтамасыз етеді.
«Қазгер-Құс» фабрикасын кеңейту – Ақмола облысының елдің азық-түлік қауіпсіздігін нығайту жөніндегі ауқымды стратегиясының бір бөлігі ғана. Параллельді түрде Астрахан ауданында «Ақтас» бройлерлік компаниясы жылына 120 миллион дана репродуктивті жұмыртқа шығару жобасын бастайды, бұл тағы 520 тұрақты және 200-ден астам уақытша жұмыс орнын береді. «Макинск құс фабрикасы» ЖШС қуаттылығын кеңейтумен қатар, жаңа ет бағытындағы инвестициялық жобалар Зеренді, Аршалы және Ерейментау аудандарында бастау алады.
Бұл жұмыстың басты бағдары – елорда нарығы. Бүгінде өңір Астана қаласының жұмыртқаға деген қажеттілігінің 50%-ын жауып отыр, бірақ таяу перспективада бұл көрсеткіш 80%-ға жеткізіледі. Ал құс еті бойынша елорда қажеттілігі 100% өнім жеткізу арқылы толықтай қамтамасыз етіледі.
Осындай жоғары қарқынды сақтау үшін өңірде мемлекеттік қолдау белсенді жүзеге асырылуда: қайта өңдеу кәсіпорындары айналым қаражатын толықтыруға жылдық 5%-бен жеңілдетілген кредиттер алуда. Бұл облыстың агрокешендерінің қуаттылығын қазіргі 60%-дан 80–90%-ға дейін арттыруға, ал негізгі бағыттар бойынша қайта өңдеуді 100% максимумға шығаруға мүмкіндік береді.
