Ақмола облысының Зеренді ауданындағы ветеринариялық станцияда еңбек тәртібі мен басқару мәдениетіне қатысты туындаған мәселе көпшіліктің назарын аудартты. Редакцияға жолданған ұжымдық хатта станция қызметкерлері бірқатар ұйымдастыру олқылықтары мен жұмыс атмосферасына байланысты қиындықтарды алға тартып отыр.
Посмотреть эту публикацию в Instagram
Хат авторларының айтуынша, мекемеде соңғы екі жылда еңбек қатынастары айтарлықтай өзгерген. Бұған бұрынғы маман-зейнеткердің орнына басшылыққа полиция органдарында қызмет еткен адамның келуі себеп болғанын алға тартады. Қызметкерлердің пайымдауынша, жаңа басшы енгізген қатаң тәртіп пен жиі жазбаша түсініктеме талап ету тәжірибесі жұмыс үдерісіне артық салмақ түсіріп, ұжымда психологиялық қысымның күшеюіне әкелген.
Редакцияға ұсынылған құжаттарда басшының қызметтік іссапарлары мен сыйақылары жөніндегі мәліметтер де бар. Онда 2025 жылы көлемді ақшалай сыйақылардың екі рет берілгені, сондай-ақ өткен жылдары да ірі сомалар төленгені көрсетілген. Ал ұжым өкілдерінің айтуынша, аталған сыйақылардың едәуір бөлігі тек басшылық деңгейінде шоғырланған.
Сонымен қатар хатта бірқатар қызметкерлерге әртүрлі себептермен ескерту мен сөгіс жарияланатыны, мереке немесе кәсіби жетістіктерге орай берілетін ынталандыру төлемдерінің кей жағдайда қысқартылатыны жөнінде жазылған. Авторлар мұны еңбек тәртібін сақтау тетігінен гөрі әкімшілік ықпал ету әдісіне айналған деп есептейді.
Ветеринария саласының мамандары төрт түліктің ауру профилактикасы мен эпизоотиялық қауіпсіздікті қамтамасыз ету бағытында жыл он екі ай үздіксіз еңбек ететіні белгілі. Ұжым мүшелері еңбек табиғатының күрделілігін ескере отырып, кадр тұрақтылығын сақтау мен жас мамандарды тарту мәселесінде қолайлы моральдық-психологиялық орта қалыптастырудың маңызын ерекше атап өтеді.
Қазіргі таңда кәсіби қауымдастық саланың дамуына кеңінен үлес қосып келе жатқан тәжірибелі мамандардың әлеуетін тиімді пайдалану қажеттігін жиі көтеруде. Сол себепті басқару мәдениетін жетілдіру, еңбек қатынастарындағы ашықтықты қамтамасыз ету және ұжым ішіндегі өзара құрмет атмосферасын қалыптастыру – сала үшін де, аймақ үшін де маңызды міндеттердің бірі.
Редакция бұл мәселеге қатысты тиісті жауапты органдардың пікірін білу мақсатында сауал жолдап, ресми түсініктеме күтуде.
