2025 жылғы 28 қарашада Қосшы қаласының Қоғамдық мәдени-спорт кешенінде жаңа театр ұжымының алғашқы туындысы – «+Qala» спектаклінің премьерасы қойылды. Лирикалық комедия жанрындағы бұл қойылым қаланың бүгінгі тынысын, ондағы адамдардың бір-біріне деген ықыласы мен ортақ құндылықтарын көркем өрнектейді.
Қойылымның авторы – жазушы, драматург Бақытбек Қадыр. Спектакльді сахналаған – жас та талантты режиссер Жұлдызбек Жұманбай. Шығармада Қосшыға түрлі өңірден келіп қоныстанған тұрғындардың тағдырлары, мінез-құлық ерекшеліктері мен ортақ ортаға бейімделу жолдары нанымды суреттеледі. Автор урбанизация үдерісінің адамдар арасындағы байланысты әлсіреткенін, алайда күтпеген жағдайлар оларды қайтадан ортақ мүддеге ұйыстырғанын көркем тілмен жеткізеді. Қойылым көрерменін адамгершілік, көршілік, бірлік секілді бағалы ұғымдарды қайта бағамдауға шақырады.
2021 жылдың 26 шілдесінде қала мәртебесін алған Қосшы қысқа уақыт ішінде даму қарқынын көрсеткен жаңа шаһар. Бұл өзгерістер де спектакль мазмұнымен астасып, жас қаланың өсу жолын көркем призмадан танытады.
Биыл шілде айында ресми түрде құрылған «Qosshy» ойын-сауық театрының алғашқы жобасы ретінде «+Qala» – ұжымның болашақ бағыт-бағдарын айқындаған мәнді мәдени бастама болды. Жаңа театрдың премьералық жұмысынан кәсіби ізденіс пен көркемдік жауапкершілік аңғарылады.
Жергілікті өнер сүйер қауым үшін маңызды мәдени оқиғаға айналған бұл спектакль Қосшының рухани өміріне тың серпін беріп, жас театр ұжымының алдағы шығармашылық ізденістеріне жол ашты.
