Азаматтық қорғаныс жоғары көпсалалы колледжінде студенттер үшін қуанышты оқиға орын алды – жаңа студенттік жатақхананың салтанатты ашылу рәсімі өтті. Бұл шара оқу орнының тарихындағы маңызды кезеңдердің бірі ретінде есте қалмақ.
Салтанатты жиынға Ақмола облысы білім басқармасының басшысы Айнагүл Балташева, «Нурбанк» АҚ өкілдері және колледждің әлеуметтік серіктестері қатысты.
Колледж президенті Шоқан Қасым қатысушыларды құттықтап, жаңа жатақхананың ашылуы – студенттердің жайлы өмір сүруі мен сапалы білім алуына жасалған үлкен қадам екенін атап өтті. Өз кезегінде, облыстық білім басқармасының басшысы Айнагүл Балташева оқу орнының ұжымын және білім алушыларды бой көтерген студенттер үйімен құттықтап, жас буынға табыс пен толағай жетістік тіледі.
Салтанатты сәтте Шоқан Қасым мен Айнагүл Балташева бірге символдық қызыл лентаны қиып, жатақхананы ресми түрде пайдалануға берді. Қонақтар жаңа ғимараттың бөлмелерін аралап, студенттердің тұрмыс жағдайымен танысты.
Іс-шара барысында қонақтар ерлік көрсетіп, өрттен үш баланы аман алып қалған 4 курс студенті Мирас Тоқсанбаевпен жүздесті. Айнагүл Балташева батыр студентке өз алғысын білдіріп, оған ноутбук пен Алғыс хат табыстап, оқуда табыс және жарқын болашақ тіледі.
2023–2025 жылдар аралығында салынған жаңа жатақхана 436 студенттің жайлы өмір сүруіне арналған. Бұл нысанның ашылуы – жастардың тұрмыс сапасын арттырып, білім беру процесінің тиімділігін күшейтетін маңызды әлеуметтік жоба болып табылады.
