Тазалық – бір адамның емес, тұтас қоғамның мәдениетін айқындайтын көрсеткіш. Қала мен ауылдың көркі, көшенің ажары ең алдымен тұрғындардың жауапкершілігі мен ұқыптылығына байланысты. Таза аула, таза көше, таза табиғат – әр азаматтың борышы әрі елге деген құрметінің белгісі.
Бүгін Косшы қаласында республикалық Таза Қазақстан акциясы аясында Таза бейсенбі экологиялық күні өтті. Шараға мемлекеттік органдардың қызметкерлері, коммуналдық қызмет өкілдері, қоғамдық ұйымдар мен қала тұрғындары белсене қатысты.
Қатысушылар аула мен көшелерді, жол жиегін, жасыл аймақтарды тұрмыстық қалдықтан тазартты. Әсіресе әлеуметтік нысандардың айналасы мен жаяу жүргіншілер жолдарының бойына ерекше көңіл бөлінді.
Ұйымдастырушылардың айтуынша, қаланы тазалау бір күндік акциямен шектелмеуі тиіс. Тазалық мәдениетін қалыптастыру – күнделікті өмір салтына айналуға тиісті игі іс. Бұл – әр азаматтың санасынан басталатын үрдіс.
«Таза орта – сау ұрпақ, ал таза ауа – берекелі өмірдің кепілі. Қала мен елді мекендердің көркеюі, ең алдымен, баршамыздың жауапкершілігімізге байланысты», – дейді акция қатысушылары.
