Бір ай бұрын Көкшетаудағы «Жақсы» дүкенінің маңындағы маскүнемдер мәселесі көтерілген болатын. Сол кезде аз уақыт тыныштық орнағанымен, жағдай қайтадан ушығып отыр. Бүгінде дүкен алдында алақан жайып, тұрғындардың жолын бөгеп ақша сұрайтындар көбейіп кеткен. Бұл, әрине, халықтың күнделікті өміріне қолайсыздық туғызып қана қоймай, азаматтардың қауіпсіздігіне де тікелей қауіп төндіреді.
Мемлекет басшысы жариялаған «Заң және тәртіп» қағидаты Көкшетауда толық орындалуда деуге әлі ерте. Өйткені тәртіп сақшыларына заң аясында әрекет етуге ешқандай кедергі жоқ. Қазақстан Республикасының Әкімшілік құқық бұзушылық туралы кодексінде нақты көрсетілген:
-
Қоғамдық орында мас күйінде жүру – ескерту жасауға немесе айыппұл салуға негіз;
-
Ұсақ бұзақылық (қоғамдық тыныштықты бұзу, азаматтарды мазалау) – 3 тәуліктен 15 тәулікке дейін әкімшілік қамауға алу шарасын көздейді.
Яғни құқықтық база бар. Бірақ ең басты мәселе – қолданыста жоқтығында. Егер полиция шара қолданбаса, маскүнемдер бір жерде қайта-қайта жиналып, тұрғындардың мазасын ала береді. Мұндай жағдайдың салдарынан ата-аналар балаларын дүкенге немесе мектепке жіберуге қорқатынын айтуда.
Бұл – жай ғана «ұсақ бұзақылық» емес, қоғамдық тәртіпті жүйелі түрде бұзу. Ал оны реттеу – полицияның тікелей міндеті. Қоғамдық тәртіптің сақталуы – азаматтардың құқықтары мен қауіпсіздігін қорғаудың басты кепілі.
Президент сөзі үш күнге ғана емес, күн сайын орындалуы тиіс. Әйтпесе, жарияланған қағидат құрғақ ұран күйінде қалып қояды.
