Ақмола облысының әкімі Марат Ахметжанов жұмыс сапары аясында Қосшы қаласына барып, бірқатар инфрақұрылымдық жобалардың жүзеге асырылу барысымен танысты.
Облыс әкімі Республика көшесіндегі скверді аралады. Жобаны іске асыру жұмыстары аяқталуға жақын. Ұзындығы 2,2 шақырым болатын аумақта жаяу жүргіншілер аймақтары, демалыс орындары ұйымдастырылып, көгалдандыру жүргізілген және шағын сәулет нысандары орнатылған.
Одан кейін Марат Ахметжанов биыл жөндеу және жол жабындысын қалпына келтіру жұмыстары жүргізілген Алтын Қазық және Сәкен Сейфуллин көшелерін аралады.
Сапар барысында облыс әкімі Аққошқаровтар отбасының жеке үйінде болып, газбен жабдықтау жүйесіне қосу жұмыстарының барысымен танысты.
Жұмыс сапары «VIAMEDIS» ЖШС көпсалалы ауруханасының құрылыс алаңын аралаумен аяқталды.
