Елдің тыныштығы мен азаматтардың амандығы – мемлекеттің басты құндылығы. Төтенше жағдайлар министрлігінің әуе құтқару қызметі осы жолда күндіз-түні дайындықта жүреді. Соның айғағы – жуырда Ақмола облысында орын алған жағдай.
ҚР ТЖМ «Қазавиақұтқару» ұшқыштары санавиация дәрігерлерімен бірлесе отырып, Степногорск қаласынан ауыр халдегі баланы Көкшетауға жедел жеткізді. Бала термиялық күйік алған болатын. Дәл уақытында көрсетілген көмек пен кәсіби іс-қимылдың арқасында ол облыс орталығындағы медициналық мекемеге сәтті жеткізілді.
Бұл – ұшқыштар мен дәрігерлердің үйлесімді жұмысының нақты көрінісі. Әуе техникасының тұрақты дайындықта тұруы шалғай елді мекендерде де азаматтарға шұғыл медициналық көмек көрсетуге мүмкіндік береді.
Әрбір қазақстандықтың өмірі – қымбат. Сондықтан төтенше жағдай қызметі мен медицина мамандарының ортақ міндеті – елдің амандығы мен қауіпсіздігін қамтамасыз ету.
