Атбасарда былтырғы су тасқынынан кейін салынған тұрғын үйлер төңірегінде тағы да дау шықты. Жаңа пәтерлерге қоныстанған тұрғындар қабырғасы жарылып, төбесі ағып, жылу жүйесі істен шыққан үйлердің жайына шағымдануда.
Қуаныш орнауы тиіс жаңа баспана бүгінде көпшілік үшін бас ауыртар мәселеге айналған.
Тұрғындармен кездескен Ақмола облысының әкімі Марат Ахметжанов мәселені ашық көтеріп, мердігерлер мен жауапты шенеуніктерге қатаң ескерту жасады.
«Егер жөндеу жұмыстары сапасыз жүргізілсе, төтенше жағдай жариялауға дейін барамыз. Әрбір кезең бақылауда болуы тиіс. Мұндай жауапсыздыққа жол берілмейді», — деді өңір басшысы.
Әкімнің айтуынша, былтыр дәл осы жобаларға байланысты бірқатар адамдар сотталған. Бірақ, өкінішке қарай, сабақ алғандар аз.
Тұрғын Айгүл Тлесова өңір басшысына фото және видео дәлелдер салынған папкасын ұсынбақ болғанын айтты. Алайда, оған «жоғары жаққа шығуға» мүмкіндік бермеген.
Айта кетейік, Атбасарда былтыр да осы мәселе бойынша бірнеше шенеунік пен мердігерлер сотталған болатын. Алайда, тұрғын үйлердің сапасына қатысты шағымдар биыл да басылар емес.
Марат Ахметжановтың Атбасар ауданының тұрғындарымен кездескен видеожазбаны nayza_kokshe инстаграм парақшамыздан көре аласыз.
