Ақмола облысы әкімінің орынбасары Алтынай Әміренова мектепке дейінгі ұйымдарда балаларды тегін тамақпен қамту тәртібіндегі өзгерістерді түсіндірді.
Әміренованың айтуынша, соңғы уақытта ата-аналардан, әсіресе көпбалалы отбасылардан өтініш көбейген. Бірақ 1 қыркүйектен бастап күшіне енген Үкіметтің №320 қаулысына сәйкес, бұл санаттағы отбасыларға қойылатын талап күшейтілген. Енді балабақшада тегін тамақ алу үшін отбасы атаулы әлеуметтік көмекке іліккен болуы немесе жан басына шаққандағы табысы ең төменгі күнкөріс деңгейінен аспауы шарт. Ол үшін тиісті құжат тапсыру қажет.
Облыс әкімінің орынбасары өңірдегі нақты мысал да келтірді.
«Жеті бала асырап отырған отбасы бар. Әкесі облыстағы ірі кәсіпорындардың бірінде басшылық қызмет атқарады. Бұрын олар, көпбалалы болғаны үшін, балабақшада тегін тамақтану құқығын пайдаланатын. Қазір мұндай мүмкіндік берілмейді. Өйткені отбасының табысы балалардың тамағын өздері төлеуге жеткілікті», — деді Алтынай Әміренова.
Ол бұл өзгерістерді Мемлекет басшысы Қасым — Жомарт Тоқаевтың ұстанымымен байланыстырады.
«Әлеуметтік қолдау әділетті болуы тиіс, яғни ол шынымен мұқтаж адамдарға ғана көрсетілуі керек», — деп түйіндеді Алтынай Әміренова.
