Қатты аязды күндері адам өмірінің қауіпсіздігін қамтамасыз ету – қоғам алдындағы ортақ міндет. Осы мақсатта Көкшетау қаласында белгілі бір тұрғылықты жері жоқ адамдарға және суықтан зардап шегу қаупі жоғары азаматтарға көмек көрсетуге бағытталған профилактикалық рейд ұйымдастырылды.
Ауа температурасының күрт төмендеуіне байланысты өткен рейдке учаскелік полиция инспекторлары, қабылдау-тарату мекемесінің қызметкерлері, әлеуметтік бейімдеу орталығының мамандары, сондай-ақ «Қазақстан Республикасының Қызыл Жарты Ай қоғамы» қоғамдық бірлестігінің Ақмола облыстық филиалының директоры Асхат Уаисов қатысты.
Мобильді топтар қала аумағындағы жылу желілері, құдықтар, тұрғын үйлердің кіреберістері мен қараусыз қалған ғимараттарды тексеріп, адамдардың уақытша паналау орындарын анықтады. Сонымен қатар, учаскелік инспекторлар алкогольдік ішімдіктерді асыра пайдаланатын әрі қатты тоңу қаупі бар азаматтар тұратын үйлерге де назар аударды.
Қоғамдық қауіпсіздік бөлімінің бастығы Азамат Метаевтың айтуынша, рейд барысында ұзақ уақыт бойы көшеде жүрген, ауа райына сай киінбеген, сыртқы келбеті ұқыпсыз адамдарға ерекше көңіл бөлінеді.
«Бейжай қарамайтын қала тұрғындары да мұндай жағдайлар туралы жиі хабарлайды. Түскен әрбір сигналға полиция қызметкерлері жедел әрекет етеді», – деді ол.
Рейдке қатысушылардың мәліметінше, ең алдымен мобильді топ азаматтың жағдайын бағалайды. Қажет болған жағдайда медициналық көмек көрсету шаралары қабылданып, адам мамандардың көмегіне жүгінеді немесе медициналық мекемеге жеткізіледі.
Дегенмен, өкінішке қарай, ұсынылған көмектен бас тартатын жандар да кездеседі. Мұндай жағдайда полицейлер түсіндіру жұмыстарын жүргізіп, қатты аязда көшеде қалудың өмірге қауіпті екенін ескертеді. Заңнамаға сәйкес, мәжбүрлеп жеткізу тек адамның өміріне нақты қауіп төнгенде немесе ол дәрменсіз күйде болған жағдайда ғана жүзеге асырылады.
Рейдтің бір күнінде әлеуметтік бейімдеу орталығына 10-нан астам адам жеткізіліп, оларға ыстық тамақ пен түнеуге арналған орын ұсынылды. Қазіргі таңда орталықта 20-ға жуық үйсіз азамат қажетті көмекті алып отыр.
Айта кетейік, қыс мезгілінің басынан бері Көкшетау қалалық полиция басқармасының қабылдау-тарату мекемесіне шамамен 50 адам жеткізілген. Барлығына медициналық және әлеуметтік қолдау көрсетілді.
Полиция қызметкерлері қала тұрғындарын бейжай қалмауға шақырып, көшеде қатты аязда жүрген адамдарды байқаған жағдайда дереу құқық қорғау органдарына хабар беруге үндейді. Себебі бір ғана қоңырау бір адамның өмірін сақтап қалуы мүмкін.
